魚米家 Tea

尋日老爺放假一天，兩公婆無所事事，一早送大小姐返學，送到大門口o個隻。跟住就走左去葵芳“潮館”飲早茶，唔知點解咁多人，等左成半粒鐘先至有位，搞到至抵食的一蚊碗仔翅都過左鐘食唔到。

由於早餐食得好飽，所以下午都無食 lunch，成四點幾先至 tea，去左愉景新城間魚米家，叫左兩個下午茶餐，老爺要左魚餃米線、火腿奄列同熱咖啡，我就要左碗仔翅（朝早食唔到唔甘心嘛！）、吉列豬扒、珍寶腸同凍檸蜜。食物大致上都 OK，個碗仔翅 d 料好多，但個“獻”杰左小小，個吉列豬扒炸得好鬆脆，加上價錢唔貴，總共都係 $47，算係咁喇！

魚餃米線

火腿奄列

碗仔翅

吉列豬扒、珍寶腸

熱咖啡、凍檸蜜