器械健體訓練班

之前報名參加的器械健體訓練班開始左上堂囉！返左兩堂，認識左幾種不同的健身器材，又試玩左一陣，幾得意。

原來有些器材只可以鍛煉肌肉，減唔到肥，要減肥，就要做一些帶氧運動，好似做跑步機、踏單車…

呢個班總共有十二堂，而出值率有 85%，康文署就會發出一張許可咭，以後就可以到全港任何一間體育館用佢地的健身器材，咁當然要俾錢啦！

P.S.不過都幾搞笑，我地班師奶竟然係全場最 young，但就最唔知點用 d 器材，是關好多學員（公公婆婆）志在入去玩，佢地都已經有哂証囉！

是日晚餐 10-Oct-07

是日晚餐：青紅蘿蔔粟米湯

節瓜粉絲炒魚片 （時常煮，因為老爺同大小姐都勁鍾意食粉絲。炸魚片嚮惠康買，幾好味。）

栗子炆雞（好好味呀！d 栗子重好“林”。）

是日晚餐 8-Oct-2007

今晚飲番尋晚飲剩的湯：五指毛桃、舞茸、扁豆、螺片煲瘦肉（無 post 相，因為同之前煲過差唔多。）

冬瓜冬菰炆燒肉

蘿蔔煮炸豬肉條（豬肉條嚮專賣炸魚蛋o既地方買，買o個時剛好炸起，熱辣辣，切片用磨豉醬煮，幾好味。）

石頭‧盛宴＠沙田

今日都好充實，一早約左 d 師奶 friends 去打羽毛球，跟住就去左飲早茶，然後我就返屋企休息左一陣，重有時間煲左一集韓劇（得閒或者會嚮個 Blog 度講下 d 劇經），之後就入左沙田喇！

今日入沙田o既主要目的就係想睇下嚮雜誌見到o個個『石頭‧盛宴』，場內所見的菜式，雖然和雜誌所見到的，真實性大減，但整個現場佈置和燈光等都不錯，只要我地加番 d 想象力就可以o架喇！

醬方肉 （呢個其實都好似。）

炭燒獅蚶

鹽焗松花蛋

五香腩仔肉

翡翠野鳥蛋

椒鹽排骨（呢個麻麻地似。）

涼拌皮蛋



五福全盒 （呢個都好似。）

水晶餃

雜錦燒味飯

太極鴛鴦飯

氣鍋燉羊血



上素燴野菌

五香栗子紅燒肉

法式芝士蛋糕

炭燒牛肋骨

乾果拼盆

碧綠時蔬

是日晚餐 4-Oct-2007

今晚本來諗住整炸菜蒸搞碎豬肉，點知 d 豬肉俾我搞下搞下，發現左一條唔應該嚮度的東西，其實我都唔知佢係咩，可能因為已經俾機器搞到不似“蟲”形，但佢重淨番 d 可能係頭o既部份，最重要係，重有兩條長長的觸鬚，唉！無計，真係唔敢食，好彩屋企重淨番 d 雞翼，唯有食瑞士雞翼囉！

鮑魚汁紹菜芋絲煮雜菇

蕃茄薯仔洋蔥甘荀湯 （無落肉但就落左 dd 雞粉）

小肥羊 Tea

尋日約左羅師奶嚮荃灣小肥羊 Tea，佢幾經辛苦、山長水遠，坐地鐵坐到傻先o黎到，真係唔係幾好意思，下次都係約 d 中間 d 的地方，講真，坐地鐵真係好悶呢！

我地邊食邊講，眨下眼就兩粒鐘，跟住就同佢去左瓜子大王買花生，行左一陣，佢就坐番地鐵返屋企喇。

佢今次入o黎荃灣，除左和我 Tea 外，重整左 d 鯊魚骨同花膠俾我，真係多謝哂佢，等我得閒整o黎滋補下先。

九月份的生日聚會

上個星期六，一班老友記去左葵芳“潮館”食晚飯，呢餐係幫阿 Maggie 慶祝生日，貪佢夠近。

其實o個晚我地都無叫咩特別菜式，都係家常小菜：川椒雞、金銀蛋莧菜、蠔仔餅、荔芋鴨……佢地 d 菜都 ok，志左坐埋一齊聚下舊咁啦，因為人太多啦，所以我都無影相。

至於 d 甜品，我地叫左雷沙湯丸、水晶飽同芋泥，除左個芋泥， Joanna 話好正外（我無試，太甜喇！），其他都唔係好掂，雷沙湯丸好“林”，個水晶飽 d 皮又太硬，認真麻麻囉！

由於用 AIG 信用咭找數有九折重有兩味小菜係 $28，所以呢餐就超經濟，八個人，都係食左 500 零蚊，好抵。

P.S. 好多謝 Maggie，佢生日竟然送上禮物俾我地。

呢個錦盒係佢嚮蘇州買的手信，好精緻。

呢 d 香口珠，係佢阿寶貝仔放暑假，o係美國帶返o黎，咁多味道，有排食。