執平貨

掃平嘢？我鍾意，特別係食得嗰啲，哈哈，冇辦法，邊叫我咁為食。

所以好喜歡周不時行下大型超市或者日式百貨，而家仲多埋各大大小小零食連鎖店。

新年過後，好多賀年糖果餅干都會割價速銷，有啲禮盒裝比平時散賣的更抵，糖果朱古力就唔敢食太多，不過餅干可以當下午茶小食，所以我呢個c9最鍾意就係過完年行超市。

話時話，賣得特別平嘅好多時都係快到期，但自己一向都對呢個唔會太緊張，因為多數其實都係 “Best Before”，咁冇理由2月1號到期，2月2號就唔食得囉，最緊要係打開試過ok。

上星期五和姊妹飲早茶，飲完早茶大家行下一田，就見到有好幾款割價速銷嘅食品、飲品……日本醋、日本即食麵、日本綠茶……平到唔敢相信，當然都係快到期，最後我哋買咗日本綠茶（$5），我仲買咗5包裝即食麵（$5），綠茶後來更比其他客人掃剩兩包囉！（綠茶返到屋企即放入雪櫃，保質時間可以更長~）

之後自己又行咗去千色店，又有平嘢執，$6桶小餅干，$9.9兩支1公升果汁，重點係全部都仲有幾個月先到期，平到笑，返屋企試咗支橙汁，都好ok喎~

其實速銷只要賣得平，好多時就算快到期，又或者從未試過嘅新品牌，好多人都會願意幫襯，總好過過哂期丟棄咁浪費啦！