2007年11月22日 星期四

蒸水蛋

好少蒸水蛋, 因為成日都蒸到“豆皮”咁,買相好唔掂 。

不過,尋日終於成功喇……

登…登…登…登… 


今次方法係水滾開始蒸,蒸兩分鐘就揭蓋, 等一陣(二三十秒左右),蓋上蓋再蒸,之後,蒸左好耐都唔會豆皮喇!

呢個方法係移左民去亞美利堅阿蔡太提供,原來真係得o架。 

其實我重聽過第二個方法, 就係放落電飯煲煲飯時齊水蒸,我重未試過,係大小姐同學仔媽咪花師奶提供,因為我個電飯煲唔係好大,拎上拎落好麻煩。 大小姐好鍾意食蒸水蛋,以後可以整多 d。

2007年11月19日 星期一

它是熊貓

尋日大小姐要考紅十會的試,送左佢到集合地點,見有時間,走左去熊貓酒店行下 Jusco $10 店,可能成日行,都無咩特別收獲 ,不過o個度 B3 擺設左一 d 熊貓的展品,雖然唔係好多,不過都幾特別o架……




媽咪愛心晚餐 18-Nov-07

尋晚返娘家食飯,食得飽飽。 

是日晚餐: 

青紅蘿蔔粟米湯 


清蒸黃立倉 (特別 order,大小姐鍾意食)


西蘭花炒牛肉


菜芯炒雜丸(最愛食汕尾魚蛋)


冬菇蒸肉餅(勁好味又健康)



區選

今次的區選,我沒有機會投票,因為我的區只有一位候選人,所以自動當選連任。我沒有甚麼意見,因為從來覺得區議員應該專注區內事務,這位候選人過往做得都不錯,我想即使要選,無論是甚麼黨、甚麼派,他都是我的優先選擇。 

今次區選,民建聯大勝,我覺得絕對是正常的賽果,因為沒有大熱的政治議題,選民多會返回注重議員的地區工作上。從來民健聯這方面都比泛民有壓倒性的優勢。反之,在 2003 年的落敗,我很失望,因為那次的投票,選民有點意氣之爭,將所有對政府的不滿都發洩在建制派身上,反而忽略他們的地區工作。希望他們在這次勝利過後,繼續積極在地區工作上努力,讓選民(特別是中間遊離派)覺得投他們一票是正確的。 

至於泛民特別是民主黨,今次慘敗亦是意料中事,他們在過去的日子,無甚建樹,唯一知道的、聽到的就是“普選、普選加普選”,他們在 2003 年成功爭取到一個好的機會,卻沒有把握將地區工作做好,結果今次的成績表給他們一記悶棍。令我更覺得可笑的,他們在失敗後,永遠都只會說他人的策略針對他們,他人怎樣怎樣打擊他們的第二梯隊……為甚麼他們不檢討自己做得不足之處?要知道再這樣下去,他們將來的路只會越來越難行。 

我並不希望選舉永遠是一面倒的勝利,因為有競爭才有進步。十二月二日又是另一場硬丈,拭目以待。

2007年11月17日 星期六

一個人的早餐

今早因為要送大小姐返學 ,阿老爺又約左班太極友行山,一個人走左去茶餐廳食早餐。

有時候,我都好享受一個人嚮街食下早餐o架,因為早上(非上班時間)通常餐廳人不多,簡簡單單一份三文治、一杯檸檬茶加埋一份報紙或雜誌,消磨成個鐘,好悠閑,好 relax,給新一天一個好開始。

呢個早餐時間,都算係大小姐升上中學後給我的一個 bonus 吧!

2007年11月16日 星期五

懶……

今日本來約左老友記羅師奶去 shopping 同 tea,點知佢唔係幾舒服 ,所以 cancel 左,無所事事 ,無咩做過,又過左一日,真係太懶喇!

Hurry up,都係拿拿聲開工做下家務先,費事老爺俾面色我睇啦……

2007年11月15日 星期四

深圳半日遊

尋日一早送左大小姐返學後,就同老爺去左葵芳葵涌廣場的大家樂食早餐,因為我地重有地鐵 d 免費早餐 coupon 未用晒,咁抵,唔好浪費。

食飽飽後,就嚮葵芳坐巴士入沙田,然後就坐火車去深圳。 

差不多十點半就到左深圳, 今次其實都係無咩特別地方想去,只是無無聊聊,行行企企咁啦,既然行行企企,咁咪坐地鐵去左東門囉……

時間尚早,人流唔多。


我地周圍轉,買得最 happy 就係嚮百佳買日用品, 雖然人民幣升值,但都重有平的東西。

重有就係嚮 d 舖頭仔,買左少少文具俾大小姐,有好多香港都見過,但呢度就平好多。

行到食 lunch 時間,今次唔嚮東門食, 我地再坐地鐵到大劇院站的萬象城,o個度好大,我地都係第一次來,似行緊 LandMark,又似行緊台北o既 101 大樓。

我地去左味千拉麵 , 味道同香港差唔多,價錢就七折左右啦。


之後,我地見重有 d 時間,就走左去行 Ole,呢處似 CitySuper,價錢一 d 都唔平呀。不過都有購物,重買左 d 蒜蓉飽,返到屋企用焗爐焗一焗,超正。


為免遲過大小姐放學時間, 我地三點零就坐的士去皇崗,然後坐直通巴士返荃灣,嚮巴士上就接到大小姐的電話話放學,o岩o岩趕得切,早過大小姐返屋企。嘻!嘻!