是日晚餐 13-Oct-07

今晚無煮飯，整左雲吞水餃擔擔麵，今次買左灣仔碼頭新出的珍菇豬肉水餃同埋嚮惠康買三送一送的西洋菜鮮蝦雲吞。

隻珍菇水餃好夠味，加上 d 菇有o趙口，真係食到唔停口。另外隻西洋菜鮮蝦雲吞，裡面好多菜重好青嫩，不過 d 蝦相對地較少，皮較厚，但都好夠味。

兩隻都值得試下o既。

魚米家 Tea

尋日老爺放假一天，兩公婆無所事事，一早送大小姐返學，送到大門口o個隻。跟住就走左去葵芳“潮館”飲早茶，唔知點解咁多人，等左成半粒鐘先至有位，搞到至抵食的一蚊碗仔翅都過左鐘食唔到。

由於早餐食得好飽，所以下午都無食 lunch，成四點幾先至 tea，去左愉景新城間魚米家，叫左兩個下午茶餐，老爺要左魚餃米線、火腿奄列同熱咖啡，我就要左碗仔翅（朝早食唔到唔甘心嘛！）、吉列豬扒、珍寶腸同凍檸蜜。食物大致上都 OK，個碗仔翅 d 料好多，但個“獻”杰左小小，個吉列豬扒炸得好鬆脆，加上價錢唔貴，總共都係 $47，算係咁喇！

魚餃米線

火腿奄列

碗仔翅

吉列豬扒、珍寶腸

熱咖啡、凍檸蜜

器械健體訓練班

之前報名參加的器械健體訓練班開始左上堂囉！返左兩堂，認識左幾種不同的健身器材，又試玩左一陣，幾得意。

原來有些器材只可以鍛煉肌肉，減唔到肥，要減肥，就要做一些帶氧運動，好似做跑步機、踏單車…

呢個班總共有十二堂，而出值率有 85%，康文署就會發出一張許可咭，以後就可以到全港任何一間體育館用佢地的健身器材，咁當然要俾錢啦！

P.S.不過都幾搞笑，我地班師奶竟然係全場最 young，但就最唔知點用 d 器材，是關好多學員（公公婆婆）志在入去玩，佢地都已經有哂証囉！

是日晚餐 10-Oct-07

是日晚餐：青紅蘿蔔粟米湯

節瓜粉絲炒魚片 （時常煮，因為老爺同大小姐都勁鍾意食粉絲。炸魚片嚮惠康買，幾好味。）

栗子炆雞（好好味呀！d 栗子重好“林”。）

是日晚餐 8-Oct-2007

今晚飲番尋晚飲剩的湯：五指毛桃、舞茸、扁豆、螺片煲瘦肉（無 post 相，因為同之前煲過差唔多。）

冬瓜冬菰炆燒肉

蘿蔔煮炸豬肉條（豬肉條嚮專賣炸魚蛋o既地方買，買o個時剛好炸起，熱辣辣，切片用磨豉醬煮，幾好味。）

石頭‧盛宴＠沙田

今日都好充實，一早約左 d 師奶 friends 去打羽毛球，跟住就去左飲早茶，然後我就返屋企休息左一陣，重有時間煲左一集韓劇（得閒或者會嚮個 Blog 度講下 d 劇經），之後就入左沙田喇！

今日入沙田o既主要目的就係想睇下嚮雜誌見到o個個『石頭‧盛宴』，場內所見的菜式，雖然和雜誌所見到的，真實性大減，但整個現場佈置和燈光等都不錯，只要我地加番 d 想象力就可以o架喇！

醬方肉 （呢個其實都好似。）

炭燒獅蚶

鹽焗松花蛋

五香腩仔肉

翡翠野鳥蛋

椒鹽排骨（呢個麻麻地似。）

涼拌皮蛋



五福全盒 （呢個都好似。）

水晶餃

雜錦燒味飯

太極鴛鴦飯

氣鍋燉羊血



上素燴野菌

五香栗子紅燒肉

法式芝士蛋糕

炭燒牛肋骨

乾果拼盆

碧綠時蔬

是日晚餐 4-Oct-2007

今晚本來諗住整炸菜蒸搞碎豬肉，點知 d 豬肉俾我搞下搞下，發現左一條唔應該嚮度的東西，其實我都唔知佢係咩，可能因為已經俾機器搞到不似“蟲”形，但佢重淨番 d 可能係頭o既部份，最重要係，重有兩條長長的觸鬚，唉！無計，真係唔敢食，好彩屋企重淨番 d 雞翼，唯有食瑞士雞翼囉！

鮑魚汁紹菜芋絲煮雜菇

蕃茄薯仔洋蔥甘荀湯 （無落肉但就落左 dd 雞粉）