是日晚餐 4-Oct-2007

今晚本來諗住整炸菜蒸搞碎豬肉，點知 d 豬肉俾我搞下搞下，發現左一條唔應該嚮度的東西，其實我都唔知佢係咩，可能因為已經俾機器搞到不似“蟲”形，但佢重淨番 d 可能係頭o既部份，最重要係，重有兩條長長的觸鬚，唉！無計，真係唔敢食，好彩屋企重淨番 d 雞翼，唯有食瑞士雞翼囉！

鮑魚汁紹菜芋絲煮雜菇

蕃茄薯仔洋蔥甘荀湯 （無落肉但就落左 dd 雞粉）

小肥羊 Tea

尋日約左羅師奶嚮荃灣小肥羊 Tea，佢幾經辛苦、山長水遠，坐地鐵坐到傻先o黎到，真係唔係幾好意思，下次都係約 d 中間 d 的地方，講真，坐地鐵真係好悶呢！

我地邊食邊講，眨下眼就兩粒鐘，跟住就同佢去左瓜子大王買花生，行左一陣，佢就坐番地鐵返屋企喇。

佢今次入o黎荃灣，除左和我 Tea 外，重整左 d 鯊魚骨同花膠俾我，真係多謝哂佢，等我得閒整o黎滋補下先。

九月份的生日聚會

上個星期六，一班老友記去左葵芳“潮館”食晚飯，呢餐係幫阿 Maggie 慶祝生日，貪佢夠近。

其實o個晚我地都無叫咩特別菜式，都係家常小菜：川椒雞、金銀蛋莧菜、蠔仔餅、荔芋鴨……佢地 d 菜都 ok，志左坐埋一齊聚下舊咁啦，因為人太多啦，所以我都無影相。

至於 d 甜品，我地叫左雷沙湯丸、水晶飽同芋泥，除左個芋泥， Joanna 話好正外（我無試，太甜喇！），其他都唔係好掂，雷沙湯丸好“林”，個水晶飽 d 皮又太硬，認真麻麻囉！

由於用 AIG 信用咭找數有九折重有兩味小菜係 $28，所以呢餐就超經濟，八個人，都係食左 500 零蚊，好抵。

P.S. 好多謝 Maggie，佢生日竟然送上禮物俾我地。

呢個錦盒係佢嚮蘇州買的手信，好精緻。

呢 d 香口珠，係佢阿寶貝仔放暑假，o係美國帶返o黎，咁多味道，有排食。

法蘭西的巧克力

這是一個 直徑 5 cm 大的盒子，打開佢，原來內有乾坤……

好精致啊！這是老爺公司同事返老家 (法蘭西) 帶回來的手信，一盒只有三塊，好名貴咁囉！

集體回憶—九龍皇帝

追月夜無煮飯，一家走左去奧海城，原來o個度正在舉行『九龍皇帝曾灶財的回顧展』，展出左唔少九龍皇帝的墨寶。回想年輕時，差不多所到之處，都很容易就碰到皇帝的真跡，隨著歲月的流逝，真跡可以找到的已不多了。

最近常常聽到集體回憶這個新名詞，所有是集體回憶的都動不得，這一點，我呢個師奶向來都有保留，因為任何兩極化的，都需要一個中間平衡點，需要 compromise。不過，九龍皇帝的剩餘少量的墨寶，保留下來，也沒有甚麼利益或其他的沖突，就留呢 d d 喇，畢竟都算是一種另類文化吧！

P.S. 回顧展至十月四日

一個人的午餐 & 大小姐的下午茶

今早同 d 師奶打完 badminton，又去左葵芳“潮館”飲茶，跟住就各自各精彩。

既然唔駛趕返屋企，就走左去百佳逛逛，見倒小菜部飯盒做特價，$9.9 一盒飯咁抵，就整左盒喇，返到屋企重暖，味道都唔差，只是茄子多了點油，不過街賣的茄子，這是必然的喇！

到左大小姐放學，因為佢重要補習，約左佢o係 KFC Tea（又KFC？），食左磨菇飯、葡撻、巴辣雞翼 & 汽水，佢都好“刷”得。

睇怕今晚到要整番杯涼茶飲下o羅，咁o岩惠康做特價，買 2 送 1，大小姐又鍾意飲，就買左三盒返屋企。

中環的半 Day

尋日約左老友羅師奶食早餐 & 食 lunch，就便 shopping，我地約左嚮中環 KFC 食早餐，諗住求求其其，中午就食得豐富 d 。

我地各叫左個鬆餅、炒蛋 & 雞扒，重要加多杯奶茶，實在太…太 full 喇，食飽飽後，即使博哂命行街街… CitySuper 、 ThreeSixty…結果，行到 lunch hour，都哽唔落，加上阿羅師奶要趕住走，最後個 lunch 要改期，留番下個禮拜。

下次早餐都係唔好食咁多喇。