2007年11月13日 星期二

Tea @ 嚐越

老爺放一個禮拜假,無咩好做,今日我地就去左荃灣廣場的嚐越食下午茶,因為係 weekday,好少人,最o岩阿老爺邊食邊嘆佢本 Harry Potter。


我叫左香茅豬扒檬 (張相 focus 得唔好,唔放上o黎喇 !唔錯,清清地。)

老爺叫左炭燒豬頸肉炒河 (唔算油,好味呀! )


我地重加左個蒸粉卷,餐飲係青檸疏打 (都 OK o架! )


呢度環境相當寬敞,食物質素都唔差 ,重有下午茶有每日特價,我食o個個就由原價 $23 減到 $19,都好抵下囉!

2007年11月12日 星期一

是日晚餐 12-Nov-2007

今晚煲左花旗參海底椰無花果螺片豬腱湯(相之前已登過)。

豆腐鯪魚肉煎餅 (參考左其他 Blog 的高手試做,抱歉搵唔番那位高人。大小姐食第一口已經話好正囉!)
 

蠔油娃娃菜炒炸豬肉條 (d 娃娃菜好甜啊!)


2007年11月9日 星期五

Dinner @ Pizza Hut

今日除左同大小姐食 lunch 之外,我地夜晚重約左婆婆同舅父到愉景新城的 Pizza Hut 食晚餐。

Pizza Hut 今期的 Visa 優惠係 American Express,老爺 終於可以碌下呢張從未碌過的咭。

佢地做的六折雙人套餐通常都好豐富,兩個人一定食唔晒,因為無記底個 Menu,淨係記得大約食過 d 咩。

特飲兩杯 (有蘆薈 & 熱情果選擇,咁就一樣一杯囉!)

餐湯兩客 (有意大利菜湯 & 雜菌忌廉湯,又係一樣一客。)

雜菜沙律(d 菜都好新鮮。)

意式乾蕃茄魷魚批 (幾好味。)

龍蝦汁海鮮鴛鴦意粉 (三選一,大小姐的至愛。)

瑞士雞翼(得四隻,我無食。)

焗蘋果卷(唔記得清楚個名,淨係記得勁“正”,ichiban!)

以上 AE 價,$208 不連加一。

我地重加左一個夏威夷風光(會員送的)同菠菜雞皇意粉,兩樣都麻麻,前者焗過龍,後者淡。

不過加加埋埋 d 優惠,找數 $280 唔駛,又幾抵咁。

雜菜沙律


龍蝦汁海鮮鴛鴦意粉


焗蘋果卷



Lunch @百人一朱

今日因為係大小姐學校的校運會翌日 ,所以佢唔駛返學 ,咁橋重係佢生日,加埋老爺放假,因此可以同佢食 Birthday Lunch 喇!

我地走左去愉景新城的百人一朱食午餐,因為去到都成兩點,返工的都返晒工,所以都好“吉”下。

估唔到佢地 d Set Lunch 都無咩加價,以咁o既價錢,有咁o既環境同食物,我覺得都好抵囉!

我地叫左三個 Set Lunch 連餐飲,找數 $150 都唔駛,OK 啦!


張相就矇左 d ,但呢個係我的至愛 “天婦羅飯定食” ,多種蔬菜炸物,加上兩隻炸蝦,好好味。重有一碗烏冬同一個雜菇雞粒前菜,太豐富喇!

我最後都無食到個烏冬,大小姐消化埋。


大小姐叫左“天婦羅蝦味噌汁凍烏冬 & 特色太卷” ,個點烏冬的汁有好香的芝麻味,重加埋蟹籽同海膽太卷 & 味噌湯,結果就係全部俾大小姐清理埋。(除左 d 小小的海膽,因為我們這一家都不愛吃魚生。)


老爺就 order 左呢個“滑蛋雞飯定食” ,佢一樣有烏冬同前菜,佢話多到差 d 食唔晒,個飯好味,烏冬佢就更加鍾意啦!(呢幅相係佢影,所以特別唔靚,嘻!)



Happy Birthday to 大小姐

今日係大小姐 12 歲牛一 ,祝佢 : 

生日快樂

身體健康 

開開心心

2007年11月7日 星期三

失職

成日都話忙,忙咩?唔知,無事忙。 

不過呢兩日,真係都幾忙,忙咩?忙煲o野囉!煲愛心靚湯?都有煲,之不過更加用左幾倍煲湯時間o黎煲劇囉!

加上呢排成日要幫大小姐熨佢 d 運動衫 ,個熨衫板同熨斗於是乎日日都霸佔左廳中的一個角落(因為淨係熨左 d 急住著,其他就諗住得閒先、夜 d 先咁啦)。

今朝重忙,一早五點半就要起床,因為大小姐學校運動會 ,重要六點九集合。忙完大小姐,就嚮返家途中,老爺就 call o黎,話 d 恤衫好似未熨呀,我先醒起,日日都話夜 d 先,夜 d 又要上網、又唔願郁,再唔係就梗係煲劇喇,卒之就攪到老爺今早咁狼狽,最後重求其咁搵左件無咁“巢”,就咁就著返工囉!

其實嫁左入老爺家門咁耐,記憶中都未試過要佢著住 d 未熨o既恤衫返工, 今次唔單止失敗,重失職哩。所以今早返到屋企,第一時間就洗衫、熨衫同煲o野,今次唔再煲劇囉,要煲就煲番個靚湯俾過阿老爺今晚飲,嘻!嘻!

2007年11月6日 星期二

幸福

記得兒時,沒有很多的娛樂,伴著我成長的是一部卡式收音錄音機。那時最愛聽電台節目,曾經在大氣電波聽過有一句說話,意思大約是:『幸福就像玻璃球,玻璃球的碎片中,有人拾得多些、有人少些……』其後一些忘記了。

回想自己在過去的數十年,覺得自己都算是擁有不少玻璃球的碎片,不如意的事當然都會發生,但愉快的日子仍然佔我過去的大多數。

我幸福,因為我有愛我的人 

我幸福,因為我有我愛的人 

我幸福,因為我不主動但仍然交上能相隨一生的知己 

我幸福,因為我有平淡但滿足的生活 

我幸福,因為我善忘,不如意事瞬間淡忘 

我幸福,因為我並不執著,可以知道放底 

從來我都沒對將來會有怎樣怎樣的奢想,只期望每一日都平靜沒有驚濤輆浪。幸福往往就不需要驚天動地,平凡而寧靜的生活在我眼中就是最幸福了! 

致家姐:

沒錯,正如您所說,我覺得當前雖然沒有奢華的生活,但每日仍然過得很幸福。當然您們都是其中不可或缺的一部份。

您也要每日幸福地過啊!