2007年11月3日 星期六

灣仔書展

尋日走左去中環同老爺食 lunch,其實都幾怕 lunch hour 嚮中環的人潮,有 d 透唔到氣的感覺,可能因為無做中環人成五年咁耐喇!

我地去左食粥,重要係大牌檔o個隻,因為我覺得呢 d 正統 d 囉。

食飽飽,就嚮呢個咁熱鬧的地方行左一陣,拍下拖咁啦。

跟住,老爺就繼續返佢o既工,我就繼續我o既忙碌 。

我走左去灣仔修頓球場,是關o個度有個書展。全場分為三個主區:十元區、五折區同八折新書區。以我呢 d 師奶性格,停留得最耐梗係十元區啦,呢處亦係全場最多人。不過雖然話係十蚊咁平,但係 d 書都無欺場 ka,有 d 重係 2006 年先出喱!書的種都唔少,小說、食譜、旅遊、CD同不少工具書等。

我都買左幾本十蚊書,買得好 Happy 囉 !

重有入場記得 keep 住張入場卷,有張五蚊 coupon,嚮八折區買書可以加埋o黎用。

書展開三日至11月4日。


2007年11月2日 星期五

是日晚餐 2-Nov-2007

又到星期五喇,通常呢一日都好少煮正常飯餐 ,是關阿大小姐最唔鍾意就係食飯 ,當然有時都會有例外,好似今晚的飯,佢就食左好多囉!

椰汁咖喱海鮮炒飯 (用左蝦、魷魚同蟹柳, d椰汁味少左d,但係都好好味!)

肉醬芝士腸天使麵(用現成的醬汁, 嚮 Jusco 買,唔錯!)

2007年10月31日 星期三

Happy Birthday to 家姐

今日係家姐(雖然唔係親的但感情絕對係)的生日大日子 ,在此祝福她: 

生日快樂 
永遠幸福 
青春長駐

2007年10月30日 星期二

五十

寫下寫下,唔覺意 就寫左成五十篇網誌。

其實當初係為左方便回應阿大小姐o既 blog先始左呢個寫 blog 日子, 不過漸漸地我已經把寫 blog、看blog 變成一個生活習慣。 

因為鍾意食o野, 所以最愛看其他關於飲食的 blog,唔識煮,睇下、流下口水都好呀! 有時看見咁多烹飪高手,做左咁多靚靚的菜肴,真係影左相都唔敢 post 上o黎 ……

不過後來諗下又唔係咁講,呢個 blog 都可以用來作為一個生活日記嘛,反正越來越老人痴呆喇,得閒睇番唔駛咩都似陣風 咁快飛走晒。

有時睇番 d 記錄,知道有 d 朋友都唔止一次上我個 blog,嚮呢度講一句 “Thank you”, 我一有時間,一定到您們家拜訪。

我係一個三分鐘熱度的人,希望嚮呢個 blog 世界會例外吧!

2007年10月29日 星期一

是日晚餐 29-Oct-2007

是日晚餐:

椰汁栗子炆雞(基本上同整開的栗子炆雞差不多,只係加左椰汁同洋蔥。大小姐話 d 椰汁勁正呢!)


青豆五香豆腐干炒蝦仁(五香豆腐干都係大小姐至愛。)


今晚煲左佛手瓜粟米甘荀牛蒡瘦肉湯,好清甜。(相以前已 post 過喇。)


2007年10月28日 星期日

姊妹聚餐@翠園

尋日夜晚,約左班姊妹到星光行翠園食晚飯,因為輪到“家姐”生日,呢處係佢選的。

由於咁耐都唔慣拎住部相機到處影,所以無影到相,不過呢處 d 菜做得好唔錯 ka,好好味……

最值得推介係佢地的靚叉燒,熱辣辣、甜度適中,重唔黏牙,一個字講晒,“正”。

我地食飽重叫左甜品,除左阿老爺之外,我地全部都係叫丸子合桃露,因為之前食過好味,今次再食(好似好無新意),不過仍然有水準,不太甜,好香合桃味,個麻蓉湯丸又好味,番食都無後悔。

至於老爺就“懶”特別咁,叫左個咖啡糕,呢幅係尋日唯一有影到的食物,個糕好精致,咁即係好“渺小”啦,不過好香咖啡味又不太甜,唔錯。

總括來講,呢度的菜仍然保持水準,食得都好滿意,而且最重要係老朋友好姊妹聚舊,傾傾講講,共聚一晚美好時光嘛!



2007年10月27日 星期六

有趣的 Cake

早幾日嚮聖安娜用餅咭換左打西餅,都是新推出的吧,因為之前都未食過,不過食落都只係一件西餅,雖然佢地的造型就拿足一百分。

嚮咁多種款式中,呢一款都算係特別喇,中間的一層竟然係“沙其馬”,個馬仔比較甜,而且可能因為雪左兩日先至食,所以馬仔有 d “林”,不過都無所謂,因為我鍾意食馬仔嘛!


重有色彩繽紛的……

果凍 & 布甸,好靚……

至於味道……just jelly……